Побрза кривична постапка за поефективна борба против криминалот

Скопје, 30 март 2023 – Мисијата на ОБСЕ во Скопје го помогна потпишувањето на Протокол помеѓу Јавното обвинителство и Министерството за внатрешни работи. Протоколот за соработка беше подготвен со поддршка на Мисијата на ОБСЕ во Скопје и ќе помогне во зајакнување на соработката помеѓу полицијата и обвинителството во насока на поефективен и ефикасен систем на кривичната правда.

„Важноста на протоколот не може да се потцени“, рече Килијан Вал, шеф на Мисијата на ОБСЕ во Скопје. „Тој ќе им помогне на полицијата и на обвинителството подобро да ги идентификуваат и истражат кривични дела и успешно да ги гонат прекршителите во согласност со националните закони и меѓународните договори. Покрај тоа, ќе ги забрза истрагите, што ќе ја зголеми ефикасноста на борбата против криминалот во оваа земја“.

Министерот за внатрешни работи, Оливер Спасовски, појасни дека за ефективна борба против криминалот потребни се закони што нема да нарушуваат истрагите.

„Нашата заедничка цел е успешно откривање, докажување и спречување на кривични дела и запирање на сторителите“, рече Спасовски. „Целта на Протоколот што го потпишавме денес е да ни помогне поефективно да ги спроведуваме кривичните постапки, земајќи ја предвид заштитата на правата на жртвите, осомничените и сторителите, во координација со националното законодавство и потпишаните меѓународни договори“.

Државниот јавен обвинител, Љубомир Јовески, рече дека „граѓаните очекуваат од нас да соработуваме и да испорачаме ефикасна правда. Само со обединет фронт против сторителите можеме да постигнеме резултати што ќе ја вратат довербата на јавноста во институциите на системот. Поради овие причини, би сакал искрено да и се заблагодарам на Мисијата на ОБСЕ во Скопје, која, како и многупати досега, ги препозна потребите и го поддржа овој процес на меѓусебна координација со Министерството за внатрешни работи“.