Подобрување на пристапот до здравствена заштита за луѓето во затворите

Луѓето во затворите го имаат истото право на здравствена заштита како и сите. Но, правото на хартија, не секогаш значи добивање медицинска нега тогаш кога е потребна.

Новиот извештај на Народниот правобранител, кој опфаќа 11 затвори во Северна Македонија, покажува дека ниту еден затвор нема здравствен персонал на располагање во текот на целиот ден и ноќ. Четири затвори немаат постојан здравствен кадар, додека седум се соочуваат со прекумерна исполнетост. Извештајот, исто така, наоѓа доцнења во специјалистичкиот третман, потешкотии во пристапот до лекови и недостатоци во грижата за менталното здравје.

Мисијата на ОБСЕ во Скопје и Народниот правобранител ги собраа на едно место претставниците на Министерството за здравство, Управата за извршување на санкциите, затворските управи и други релевантни институции, со цел да разговараат за овие наоди и за потребните промени. 

„Кога истите проблеми се пријавуваат од година во година, тоа е знак дека системот не ги дава очекуваните резултати. Потребни ни се практични решенија кои реално ќе се спроведуваат“, рече Фатон Селами, Народен правобранител на Северна Македонија.

Дискусијата се задржа на практичните начини за решавање на проблемите утврдени во извештајот, вклучувајќи обезбедување на доволен медицински кадар, подобрување на одговорот при итни случаи, овозможување подобар пристап до специјалистички третмани и лекови, како и зајакнување на поддршката за менталното здравје.

„Лишувањето од слобода никогаш не смее да значи лишување од достоинство“, рече амбасадорот Килијан Вал, шеф на Мисијата на ОБСЕ во Скопје. „Лицата во притвор и понатаму имаат право на почитување на нивните човекови права, вклучително и нивното право на здравствена заштита.“

Учесниците исто така разговараа за тоа како затворите, давателите на здравствени услуги и одговорните институции можат подобро да соработуваат за да се обезбеди дека луѓето ја добиваат потребната грижа, без разлика каде се притворени.